Kuthubutu hujenga ujasiri na uwezo wa kujifunza

Thubutu Leo, Jifunze na Ukomae

Katika safari ya maisha, hasa kwa vijana wanaotafuta mafanikio ya kiuchumi, hakuna silaha kubwa kama ujasiri wa kudhubutu, kudhubutu ni uamuzi wa kuchukua hatua, kufanya majaribio, na kukabiliana na changamoto bila woga wa kushindwa.

Ni nguvu ya ndani inayomfanya kijana aamini katika uwezo wake, atoke katika eneo la faraja na afuate ndoto zake kwa bidii na matumaini makubwa.

ujasiri hauji kwa bahati, hujengeka kupitia vitendo vya kuthubutu, Kila mtu anapojaribu jambo jipya, anajifunza, anapata uzoefu, na kujenga imani zaidi katika uwezo wake, vijana wengi hujinyima fursa za mafanikio kwa kuogopa kushindwa au kubezwa, lakini ukweli ni kwamba kila hatua ya ujasiri huongeza nguvu ya kupambana ndani.

Kuthubutu huondoa hofu, na kwa kufanya hivyo, kijana anakuwa tayari kukabiliana na changamoto kubwa zaidi.

Mfano halisi ni kijana anayeamua kuanzisha biashara ya kuuza bidhaa mtandaoni bila mtaji mkubwa, mwanzoni anaweza kukumbana na changamoto nyingi ukosefu wa wateja, changamoto za masoko au mitaji midogo.

Lakini kwa kuendelea kuthubutu, anajifunza mbinu bora, anazoea mazingira ya biashara, na hatimaye anakuwa mjasiriamali mwenye mafanikio, ujasiri wake unajengeka kwa kila hatua anayoipiga.

Elimu bora haipo tu madarasani, ipo katika vitendo. Kudhubutu humsaidia kijana kujifunza kwa kufanya, si kwa kusubiri kila jaribio, liwe limefanikiwa au limekosa, linatoa funzo muhimu, vijana wanaothubutu kuanzisha miradi, hata midogo, hujifunza ujuzi wa kupanga, kuongoza, kushirikiana na wengine, na kusimamia rasilimali.

Kujifunza kutokana na makosa ni somo kubwa katika ujasiriamali, shuhuda za watu wengi waliofanikiwa duniani wanadai walipata changamoto nyingi kabla ya kufikia kilele cha mafanikio.

Walijifunza kutokana na makosa yao, wakarekebisha njia, na kuendelea mbele kwa nguvu mpya, hivyo basi, kijana anatakiwa kutambua kuwa kushindwa hakumaanishi mwisho bali ni sehemu ya mchakato wa kujifunza na kukua.

Kudhubutu ni moja ya nia ya kuvunja hofu, moja ya vikwazo vikubwa vinavyowanyima vijana mafanikio ni hofu ya kushindwa, hofu ya kukosolewa, au hofu ya kuonekana dhaifu, kudhubutu ni dawa ya hofu.

Pale kijana anapothubutu kufanya jambo analoamini, anaanza kuvunja minyororo ya hofu hatua kwa hatua, kadiri anavyoendelea kufanya majaribio, ndivyo ujasiri wake unavyoongezeka.

Kuthubutu si lazima kuanzie kwenye miradi mikubwa la asha; Hata hatua ndogo, kama kuanza kuuza bidhaa za mikono, kutoa huduma ndogo katika jamii, au kuanzisha kilimo cha bustani, ni mwanzo mzuri.

Kila mafanikio madogo humjenga kijana kiakili na kimaamuzi ni kama mbegu ndogo inayoota na kuwa mti mkubwa wa mafanikio.

Huu ndio uhusiano kati ya kudhubutu na mafanikio, mafanikio ya kiuchumi hayawezi kupatikana bila hatua, kudhubutu ndio hatua ya kwanza kuelekea kujitegemea kifedha, vijana wanaothubutu kuanzisha biashara au miradi ya ubunifu wanakuwa na nafasi kubwa zaidi ya kuondokana na utegemezi.

Ujasiriamali ni injini ya maendeleo na vijana ndio injini ya taifa, kila kijana anayechukua hatua ya kujiajiri anasaidia si tu kuboresha maisha yake binafsi, bali pia kuongeza ajira kwa wengine.

Tuchukulie mfano wa vijana wanaotumia teknolojia leo kuanzisha biashara mtandaoni, Wengine wameanzisha majukwaa ya kuuza bidhaa za ndani, wengine wanatoa huduma za ubunifu kama utengenezaji wa maudhui, programu au ushauri.

Wote hawa walikuwa na kitu kimoja cha msingi walithubutu, uamuzi wao wa kujaribu, licha ya changamoto, umewafungulia milango ya mafanikio ya kiuchumi na kijamii.

Kudhubutu hujenga nidhamu na msimamo, ujasiri bila nidhamu ni kama mashua isiyo na usukani, kudhubutu humfundisha kijana umuhimu wa kupanga, kufuatilia malengo, na kutokata tamaa.

Safari ya ujasiriamali si rahisi, lakini wale wanaoendelea licha ya magumu ndiyo wanaofikia mafanikio, kuthubutu humfanya kijana awe na msimamo anajua anachotaka na anapigania kukipata.

Kila changamoto anayokutana nayo humjenga zaidi, anaanza kujua wakati gani wa kubadilisha mikakati, jinsi ya kushirikiana na wengine, na namna ya kuhimili presha, msimamo huu ndio unaojenga viongozi wa baadaye wale wanaoweza kusimama imara hata katika mazingira magumu.

Kudhubutu si jukumu la kijana pekee bali ni jukumu la jamii kwa ujumla. Serikali, taasisi, na jamii inapaswa kuunga mkono juhudi za vijana wanaothubutu, wapewe elimu ya ujasiriamali, mikopo nafuu, mafunzo ya usimamizi wa fedha, na nafasi ya kuonyesha ubunifu wao.

Pale kijana anapojua kuwa anaungwa mkono, moyo wake wa kuthubutu unaongezeka maradufu, Pia, wazazi na walezi wanapaswa kubadili mtazamo kuhusu kushindwa badala ya kubeza, wawatambue vijana wanaojaribu, hata kama hawakufanikiwa mara ya kwanza. Ujasiriamali ni safari, na kila hatua ni somo.

Kudhubutu hujenga ujasiri, hufungua akili, na hutoa uzoefu wa maisha halisi, kila kijana anayechukua hatua ya kuthubutu leo, anajiwekea msingi wa mafanikio ya kesho, ujasiri wa leo ndio utakaokupa uzoefu wa kesho na mafanikio ya baadaye.

Usisubiri mazingira kamili anza na ulicho nacho. Fanya majaribio, jikosee, jifunze, na songa mbele, mafanikio hayaji kwa walio salama katika eneo la faraja, bali kwa wale wanaothubutu kuvuka mipaka ya hofu.

Kwa hiyo, kijana wa leo, thubutu kuanza, thubutu kujifunza, thubutu kushindwa, na thubutu kufanikiwa, kila hatua ya ujasiri unayochukua ni somo jipya na ngazi ya kukupandisha juu zaidi katika safari ya mafanikio ya kiuchumi.

Nguvu ya kudhubutu ndiyo chachu ya mafanikio anza leo, jiamini, na dunia itakujua kesho.