Utulivu katika maamuzi, siri ya kufikia uamuzi sahihi

Uwezo wa kufanya maamuzi sahihi si jambo linalotokea kwa bahati bali ni zao la akili iliyo tulivu na yenye uwezo wa kutafakari kwa kina.

Katika maisha ya kila siku, kila binadamu hukutana na hali zinazohitaji kufanya maamuzi iwe ni madogo kama kuchagua maneno ya kusema katika mazungumzo, au makubwa kama kuamua kazi ya kufanya, mwenza wa maisha, au aina ya uwekezaji wa kuanza.

Utulivu ni nguzo muhimu inayomsaidia mtu kufikiri kwa makini, kutathimini hali halisi, na kuchukua hatua bila kuathiriwa na hisia kali au shinikizo la muda, katika ulimwengu wa leo unaoendeshwa na kasi na presha za kijamii, utulivu umekuwa kama hazina adimu ambayo wachache wanaibeba.

Wakati mtu anabaki mtulivu, akili yake inapata nafasi ya kuchambua hali kwa undani na kuona mambo kwa uwazi zaidi, tafiti za kisaikolojia zinaonyesha kwamba ubongo wa mwanadamu hufanya maamuzi bora zaidi unapokuwa katika hali ya utulivu na uwiano wa kihisia.

Utulivu huzuia mawazo ya haraka yasiyo na msingi na huruhusu mantiki kuongoza mchakato wa fikra, kwa mfano, mfanyabiashara anayekabiliwa na hasara kubwa anapochukua muda wa kutulia na kutathmini chanzo cha tatizo, huwa na nafasi kubwa zaidi ya kubuni suluhisho endelevu kuliko yule anayekurupuka kufunga biashara au kulaumu wengine.

Pia utulivu hupunguza makosa ya kihisia, watu wengi hujuta baadaye baada ya kufanya maamuzi wakiwa wameguswa na hisia iwe ni hasira, huzuni, woga, au furaha ya ghafla.

Hisia kali hufumba macho ya akili na kumfanya mtu atende kwa msukumo badala ya busara, mfano wa kawaida ni katika mahusiano, watu wengi huvunja ndoa, urafiki, au ushirikiano wa kazi kwa maneno ya hasira ambayo yangedhibitiwa kwa sekunde chache za utulivu.

Utulivu husaidia kudhibiti hisia, kuzipa nafasi ya kutulia, na kisha kufanya uamuzi wenye mizani ya kiakili na kihisia, kama msemo wa busara unavyosema: “Anayechukua muda kufikiri, huchukua muda kufanikiwa.”

Kadhalika, Mtu anayefanya maamuzi kwa utulivu huwa na imani kubwa katika maamuzi yake kwa sababu ameyafikia kupitia tafakuri na tathmini ya kina, anaelewa kwa nini amechagua njia fulani na yuko tayari kubeba matokeo yake mazuri au mabaya, watu wa namna hii huwa na msimamo thabiti na hawatikisiki kirahisi na maneno ya watu.

Maamuzi mengi katika maisha yanahusisha watu wengine, mtu mwenye utulivu ana uwezo wa kusikiliza kwa makini, kuelewa mitazamo tofauti, na kufikia makubaliano yenye manufaa kwa pande zote.

Katika familia, mfano, mzazi mtulivu anapokuwa na mgogoro na mtoto wake, ana nafasi kubwa ya kujenga uelewano kuliko yule anayepandwa na hasira na kutoa adhabu za papo kwa papo. Vilevile, katika mazingira ya kazi, meneja mtulivu hujenga timu yenye amani na tija kwa sababu hufanya maamuzi yanayozingatia hisia na utu wa wafanyakazi wake.

Maamuzi ya utulivu hutokana na tafakuri, uchambuzi, na busara, kabla ya kuamua, mtu anapima faida na hasara, anajipanga kimkakati, na kujua matokeo yanayoweza kujitokeza.

Kwa mfano, mtu anayefikiria kuacha kazi atachunguza hali ya kifedha, fursa mbadala, na athari za muda mrefu kabla ya kuchukua hatua.

Kwa upande mwingine, maamuzi ya kukurupuka hufanywa kwa haraka kutokana na msukumo wa hisia, shinikizo, au tamaa, Matokeo yake mara nyingi ni majuto, mfano, mtu anayewekeza fedha zote kwenye biashara kwa sababu ya kusikia “inatoa faida haraka” bila kufanya utafiti wa kina, anaweza kujikuta akipoteza kila kitu.

Kama inavyosemwa, “Uamuzi wa haraka unaweza kuwa mwanzo wa majuto ya muda mrefu.”

Yapo matokeo Chanya ya Kufanya Maamuzi kwa Utulivu, Maamuzi yaliyofikiriwa kwa kina huwa na msingi imara, hivyo uwezekano wa mafanikio ni mkubwa, mtu anaweza kuyatetea bila wasiwasi kwa sababu anajua mchakato uliomfikisha hapo.

Pia uchangia amani ya Moyo na Akili, uamuzi unaotokana na utulivu huleta amani ya ndani, hata kama matokeo si makamilifu, mtu anajua alifanya kile kilicho sahihi kulingana na mazingira ya wakati huo.

Matokeo mengine ni mahusiano bora na watu Wengine, utulivu hujenga heshima, uelewano, na Imani, watu humwamini mtu mtulivu kwa sababu hawawezi kumtarajia kutoa kauli au uamuzi wa ghafla.

Kadhalika uchochea ukuaji wa kibinafsi, kila uamuzi wa busara humjenga mtu kuwa mwenye hekima zaidi. Kadri mtu anavyojifunza kutulia na kufikiri kabla ya kuamua, ndivyo anavyoimarika kiakili na kihisia.

Namna ya kukuza utulivu katika maamuzi

Utulivu si kipaji cha kuzaliwa; ni tabia inayoweza kujengwa, baadhi ya mbinu zinazoweza kusaidia ni: Kupumua kwa kina na kuahirisha majibu ya haraka, kabla ya kujibu au kuamua jambo linalokuletea hisia kali, chukua dakika chache kupumua na kufikiri. Kutafuta taarifa kamili kabla ya kuamua, usifanye uamuzi kwa maneno ya upande mmoja bali kusanya ukweli wote muhimu.

Pia, kujifunza usimamizi wa hisia, tambua hisia zako, lakini usiruhusu zikuongoze, kutafakari au kufanya mazoezi ya akili, njia hizi husaidia kudhibiti mawazo na kuongeza umakini, Kusikiliza ushauri, watu wengine wanaweza kukuona kwa jicho la nje na kukupa mtazamo mpana zaidi.

Utulivu ni msingi wa hekima na dira ya uamuzi sahihi, katika dunia yenye harakati nyingi, kelele, na mitandao inayohamasisha kasi kuliko fikra, uwezo wa kubaki mtulivu unapochukua maamuzi ni silaha adimu ya mafanikio.

Mtu anayejifunza kutoshukishwa na hisia, kupima kwa kina, na kuchukua hatua kwa busara, hujenga maisha yenye mwelekeo, heshima, na amani.

Kwa hivyo, kabla ya kutoa uamuzi wowote iwe ni katika kazi, mahusiano, au maisha binafsi tulia, pumua, fikiria, kisha amua, hapo ndipo utagundua nguvu ya kweli ya utulivu katika safari ya hekima na mafanikio.